យុវនិស្សិតឆ្នើមរបស់កម្ពុជាទាំង៦រូបបានត្រឡប់មកដល់មាតុភូមិវិញបន្ទាប់ពីបានចូលរួមវេទិកាបណ្តាញយុវជនបង្ការគ្រឿងញៀននៃបណ្តាប្រទេសអនុមហាតំបន់ទន្លេមេគង្គ

រាជធានីភ្នំពេញ: កាលពីយប់ថ្ងៃទី២៥ ខែសីហា ឆ្នាំ ២០២២ ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានទៅទទួលយុវនិស្សិតឆ្នេីមដែលត្រឡប់ពីចូលរួមវេទិកាបណ្តាញយុវជនបង្ការគ្រឿងញៀននៃបណ្តាប្រទេសហត្ថលេខីនៃមហាអនុតំបន់ទន្លេមេគង្គទាំង៦មាន : កម្ពុជា ចិន ថៃ វៀតណា ម ឡាវ ភូមា នៅព្រលានយន្តហោះអន្តរជាតិភ្នំពេញ។

វរសេនីយ៍ឯក យិន យឿត អនុប្រធាននាយកដ្ឋាននីតិកម្ម អប់រំ និងស្តារនីតិសម្បទា និងជាអ្នកសម្របសម្រួល បានឱ្យដឹងថា យុវជនទាំងអស់បានសម្តែងនូវទឹកចិត្តដោយមិនអាចបដិសេធបានទេថាកម្មវិធីនេះពិតជាបានផ្តល់នៅចំណេះដឹង និងបទពិសោធន៍យ៉ាងច្រើនដូចជា ការបង្ការ ទប់ស្កាត់បញ្ហាគ្រឿងញៀន ប្រភេទនៃគ្រឿងញៀន តាមរយ:ការធ្វេីទស្សនកិច្ចសិក្សាស្វែងយល់ ចែករំលែកបទពិសោធន៍ នៅចំការអាភៀន
ប្រវត្តិនៃគ្រឿងញៀន វប្បធម៌ ប្រពៃណីទំនៀមទម្លាប់របស់ប្រទេសទាំងអស់ ពង្រីកបាននូវចំណេះដឹង និងទំនាក់ទំនងក្នុងនាមជាប្រទេសសហគមន៍តែមួយ វាសនាតែមួយ។

វរសេនីយ៍ឯក យិន យឿត បានឱ្យដឹងបន្ថែមថា យុវនិស្សិតក៏បានសិក្សាស្វែងយល់ផ្ទាល់ ពីដំណាំអាភៀន តំបន់ត្រីកោណមាស សារមន្ទីររបស់ប្រទេសថៃ ឡាវ និងមីយ៉ាន់ម៉ា ប្រាសាទបុរាណជាច្រើន ពីសាកលវិទ្យាល័យធំៗ។ សិក្សាស្រាវជ្រាវបន្ថែមអំពីគម្រោង Roi jai Rak Farm ដែលបានបង្កើតឡើងនៅឆ្នាំ ២០១៨ ដែលបានកែលម្អផ្ទៃដីនៅតំបន់ឈៀងម៉ៃ ដែលពីមុនគ្មានការយល់ដឹងមកជាតំបន់ដីកសិកម្ម ដាំដុះដំណាំបន្លែផ្លែឈើ ចិញ្ចឹមសត្វដែលអាចរកកម្រៃនិងប្រាក់ចំណេញខ្ពស់ជាពិសេសចំពោះបុគ្គលណាដែលធ្លាប់ប្រព្រឹត្តខុសប្រើប្រាស់គ្រឿងញៀន ជួញដូរគ្រឿងញៀន កែខ្លួនផ្លាស់ប្ដូរជោគវាសនានិងជីវភាពរស់នៅរបស់ខ្លួន។

វរសេនីយ៍ឯក យិន យឿត បន្ថែមទៀតថា អ្នកចូលរួមទាំងអស់បានថ្លែងអំណរគុណនិងកោតសរសើរដល់ប្រទេសថៃ និងឡាវដែរបានទទួលស្វាគមន៍យើងយ៉ាងកក់ក្តៅបំផុត ទាំងកន្លែងស្នាក់នៅ និងអាហារហូបចុកប្រកបដោយសុខភាព និងផាសុខភាព និងយកចំណេះដឹងដែលបានពីវគ្គនេះទៅផ្សព្វផ្សាយបន្តដល់សិស្ស និស្សិត ដែលបាននិងកំពុងសិក្សារៀនសូត្រនៅតាមសាកលវិទ្យាល័យតាមប្រទេសរៀងៗខ្លួនព្រមទាំងនឹងពង្រឹងទំនាក់ទំនងជាបណ្តាញយុវជនសម្រាប់ការងារប្រយុទ្ធប្រឆាំងគ្រឿងញៀនក្នុងក្របខណ្ឌនៃការងារអប់រំ ទាំងរដ្ឋ និងឯកជនផងដែរ ។

ឯកឧត្ដម សោម ស័ក្តិ រដ្ឋមន្ត្រីក្រសួងយុត្តិធម៌ បានថ្លែងថាត្រីកោណមាស ជាកន្លែងផលិតគ្រឿងញៀនដែលជះឥទ្ធិពលយ៉ាងធ្ងន់ធ្ងរដល់ប្រទេសនៅក្នុងអនុតំបន់មេគង្គ ហេីយបណ្តាញយុវជនគឺជាបណ្តាញដ៏សំខាន់មួយដែលជួយជំរុញដ៏មានសក្ដានុពលសម្រាប់ការទប់ស្កាត់គ្រឿងញៀនប្រកបដោយប្រសិទ្ធភាព ពេលដែលពួកគេអភិវឌ្ឍជំនាញបានត្រឹមត្រូវតាមអាយុរបស់ពួកគេ និងបា ថ្លែងអំណរគុណដល់អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា ដែលបានគាំទ្រចាត់តំណាងវ័យក្មេងចូលរួមក្នុងកម្មវិធីនេះ។

ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ក៏បានថ្លែងអំណរគុណដល់មិត្តថៃនិងប្រទេសជាមិត្តដែលបានគាំទ្រ ដល់សកម្មភាពប្រយុទ្ធប្រឆាំងគ្រឿងញៀននៅកម្ពុជា។

សូមបញ្ជាក់ថា កម្ពុជាបានចាត់យុវជនឆ្នើម៦រូបចូលរួមវេទិកាបណ្តាញយុវជនបង្ការគ្រឿងញៀននៃបណ្តាប្រទេសហត្ថលេខីនៃមហាអនុតំបន់ទន្លេមេគង្គ ដែលមានរយ:ពេល១០ ថ្ងៃ ពីថ្ងៃទី១៥ ខែសីហា ដល់ថ្ងៃទី២៥ ខែសីហា ឆ្នាំ២០២២ នៅប្រទេសថៃ និងប្រទេសឡាវ ៕

Post a Comment

Post a Comment

Contact Form